دليل المبتدئين مصطلحات التسويق العقاري عبر البريد الالكتروني
المحتويات
يا ترى لسه بتعتمد على الطرق التقليدية في التسويق العقاري؟ زي اللافتات في الشوارع أو توزيع بروشورات؟ طيب، خليني أقولك إنك فايتك كتير! السوق العقاري المصري مليان منافسة، وكل يوم فيه مسوقين بيحاولوا يوصلوا لعملاء جادين بسرعة، لو عايز تتميز عنهم وتبيع أكتر، لازم تجرب حملات الايميل.
التسويق العقاري عبر الايميل مش بس وسيلة رخيصة، ده كمان طريقة فعالة جدًا عشان توصل للعميل الصح في الوقت الصح، وتبني معاه علاقة طويلة الأمد تضمنلك مبيعات مستمرة.
تخيل إنك بتبعت إيميل لعميل مهتم بشقة في التجمع الخامس، فيه صور الشقة، تفاصيل المشروع، وخصم خاص لمدة يومين بس، العميل ده هيحس إن العرض مخصص ليه، وهيتحفز يتصل بيك على طول، ده اللي بيخلي التسويق العقاري عبر البريد مختلف عن أي طريقة تسويق تانية.
في المقال ده، هناخدك خطوة بخطوة عشان تبدأ حملات تسويق بالإيميل ناجحة، من أول المصطلحات الأساسية اللي لازم تفهمها، لحد الأدوات اللي هتحتاجها، وخطوات عملية عشان تعمل حملة ناجحة، ونصايح وأمثلة هتساعدك تجيب نتايج حقيقية في السوق العقاري المصري، المقالة موجهة ليك لو أنت مبتدئ في التسويق العقاري، وهنحاول نكون واضحين وبسطاء عشان تقدر تطبق كل حاجة بنفسك.
المصطلحات الأساسية في التسويق العقاري عبر البريد
قبل ما نتعمق في التفاصيل، لازم نفهم شوية مصطلحات أساسية هتساعدنا نتكلم نفس اللغة ونفهم إزاي التسويق العقاري عبر البريد الالكتروني بيشتغل، المصطلحات دي هي الأساس اللي هتبني عليه نجاح حملاتك.
القائمة البريدية (Mailing List)
القائمة البريدية هي ببساطة قاعدة بيانات فيها إيميلات العملاء المحتملين والمهتمين بمجال العقارات، يعني لو عندك 1000 إيميل لناس مهتمين بشقق في القاهرة الجديدة، دي هتبقى قائمتك البريدية، كل ما كانت القائمة دي أكبر وأكثر استهدافًا، كل ما كانت فرصتك في البيع أكبر.
في مجال العقارات، لازم تركز إن القائمة البريدية تكون مكونة من عملاء جادين، يعني مثلاً، لو بتبيع شاليهات في الساحل الشمالي، حاول تجمع إيميلات ناس فعلاً بتدور على شاليهات، مش ناس بتدور على أراضي زراعية، تقدر تجمع القائمة دي من خلال موقعك الإلكتروني، إعلانات السوشيال ميديا، أو حتى معارض العقارات اللي بتشترك فيها، القائمة البريدية هي كنزك، فكل ما كانت جودتها أحسن، كل ما هتبيع أكتر.
معدل فتح الرسائل (Open Rate)
معدل فتح الرسائل هو النسبة المئوية للناس اللي فتحوا الإيميل بتاعك من إجمالي عدد اللي وصلهم الإيميل، يعني لو بعتت 1000 إيميل و400 واحد فتحوه، يبقى معدل الفتح بتاعك هو 40% المعدل ده مهم جدًا لأنه بيوريك إذا كان العنوان (Subject Line) بتاع الإيميل جذاب كفاية ولا لأ.
في التسويق العقاري، لازم تحط عنوان يجذب العميل على طول، مثلاً، بدل ما تكتب “عرض جديد على شقق في التجمع”، جرب تكتب “امتلك شقتك في التجمع بخصم 10% لمدة يومين بس!”، العنوان ده هيخلي العميل يحس إن فيه حاجة مهمة لازم يشوفها، وبالتالي معدل الفتح هيزيد. لو معدل الفتح بتاعك قليل، يبقى لازم تغير العنوان وتجرب حاجة تانية.
معدل النقر (Click-Through Rate – CTR)
معدل النقر أو الـ CTR، هو النسبة المئوية للناس اللي ضغطوا على رابط معين جوا الإيميل (زي رابط لموقعك أو لصفحة مشروع عقاري) من إجمالي عدد اللي فتحوا الإيميل، يعني لو 400 واحد فتحوا الإيميل، و80 واحد منهم ضغطوا على الرابط، يبقى معدل النقر بتاعك هو 20%.
المعدل ده بيوريك مدى اهتمام الناس بالمحتوى اللي بتقدمه، في مجال العقارات، حاول دايمًا تحط روابط واضحة في الإيميل، زي “اضغط هنا عشان تشوف صور الشقة” أو “احجز معاينة دلوقتي” كمان، الصور الجذابة والعروض الحصرية زي “خصم 15% لمدة 48 ساعة” بتساعد تزود معدل النقر، لو معدل النقر بتاعك قليل، جرب تحط محتوى أكتر جاذبية أو عروض أقوى.
معدل الارتداد (Bounce Rate)
معدل الارتداد هو النسبة المئوية للإيميلات اللي مرجعتش تاني بسبب إن الإيميل غلط أو مش موجود، فيه نوعين من الارتداد:
- الارتداد الصلب (Hard Bounce): يعني الإيميل ما وصلش لأن العنوان غلط أو مش موجود أصلاً، مثلاً، لو الإيميل كان “[email protected]” بدل “[email protected]”، ده هيترجع ليك كارتداد صلب مفيش حاجة اسمها gnail اصلا.
- الارتداد الناعم (Soft Bounce): يعني الإيميل ما وصلش مؤقتًا، زي إن صندوق الوارد بتاع العميل مليان أو فيه مشكلة في السيرفر.
في السوق العقاري، لو معدل الارتداد عالي، ده بيأثر على سمعتك كمرسل، وممكن إيميلاتك تروح للـ Spam عشان كده، لازم تنضف قائمتك البريدية باستمرار، وتشيل أي إيميلات مش صحيحة، لو بعتت لـ 1000 إيميل و50 اترجعوا كارتداد صلب، شيل ال50 دول من قائمتك على طول عشان تحافظ على جودة القائمة.
إلغاء الاشتراك (Unsubscribe)
إلغاء الاشتراك يعني إن العميل قرر إنه ما يستقبلش إيميلات منك تاني، لما بتبعت إيميل، لازم تحط رابط واضح في نهاية الإيميل مكتوب عليه “إلغاء الاشتراك” أو “Unsubscribe”، عشان العميل لو مش عايز يتابعك، يقدر يلغي اشتراكه بسهولة، لازم تحترم رغبة الناس دي وتشيلهم من القائمة فورًا.
في التسويق العقاري، لو لقيت إن نسبة إلغاء الاشتراك عالية، يبقى فيه حاجة غلط في إيميلاتك، يمكن بتبعت كتير أوي، أو بتبعت عروض مش مناسبة للعملاء، مثلاً، لو عميل مهتم بشاليهات في الساحل وبعتتله عرض على أراضي في الصعيد، أكيد هيحس إن الإيميل ما ينفعلوش وهيلغي اشتراكه، عشان تقلل نسبة إلغاء الاشتراك، حاول تبعت إيميلات مخصصة لكل عميل بناءً على اهتماماته.
الأدوات الأساسية لبدء التسويق العقاري عبر البريد الالكتروني
دلوقتي، عشان تبدأ صح، محتاج تجهز الأدوات اللي هتساعدك في المهمة دي، الأدوات دي هتخليك تعمل حملات احترافية بسهولة، حتى لو أنت مبتدئ.
منصات البريد الالكتروني إزاي تختار منصة مناسبة ليك؟
منصات البريد الالكتروني هي مواقع أو برامج بتوفرلك كل الأدوات اللي محتاجها عشان تبعت إيميلات احترافية، وتتابع النتايج، وتعمل كل حاجة بسهولة، فيه منصات كتير، وكل واحدة ليها مميزاتها، هنا هنتكلم عن أشهر المنصات وإزاي تختار منها.
Mailchimp من أشهر المنصات في العالم، وبيقدم خطة مجانية تسمح لك تبعت لـ 500 عميل في الشهر المنصة دي سهلة جدًا، وفيها قوالب جاهزة تقدر تستخدمها عشان تصمم إيميلات شكلها احترافي، يعني لو عايز تبعت إيميل فيه صور شقة في التجمع، تقدر تختار قالب، تضيف الصور، وتبعت في دقايق.
Sendinblue منصة تانية ممتازة، وبيقدم خطة مجانية تسمح لك تبعت 300 إيميل في اليوم، المميز في Sendinblue إنه بيدعم لغات كتير، وده بيفيدك لو بتتعامل مع عملاء أجانب مهتمين بالسوق العقاري المصري، كمان، بيقدم أدوات تحليل بسيطة عشان تعرف إزاي تحسن حملاتك.
MailerLite منصة بسيطة وسعرها كويس، ومناسبة جدًا للمسوقين العقاريين، بتقدم خطة مجانية لـ 1000 مشترك، وفيها أدوات تصميم سهلة، لو أنت مبتدئ ومش عايز حاجة معقدة، MailerLite هتبقى اختيار كويس.
Benchmark Email منصة سهلة الاستخدام وبتوفر مجموعة متنوعة من القوالب الجاهزة، بتقدم خطة مجانية تسمح لك تبعت 250 إيميل في الشهر، وفيها دعم فني قوي حتى في الخطة المجانية، لو محتاج مساعدة في أي وقت، المنصة دي هتكون مناسبة ليك.
GetResponse منصة قوية بتوفر أدوات أتمتة التسويق المتقدمة، الخطة المجانية بتاعتهم تسمح لك تبعت لـ 500 مشترك، وفيها أدوات زي الـ Landing Pages اللي هتساعدك تجمع إيميلات أكتر، لو عايز منصة تكبر معاك وأنت بتطور، GetResponse هيبقى اختيار ممتاز.
إزاي تختار المنصة المناسبة؟
- شوف اللي بتقدم أكبر عدد من الإيميلات المجانية: لو قائمتك صغيرة (أقل من 500 عميل)، ابدأ بـ Mailchimp أو Sendinblue لأنهم بيقدموا خطط مجانية كويسة.
- تأكد إن المنصة سهلة الاستخدام: جرب المنصة بنفسك قبل ما تشترك، وشوف إذا كانت بسيطة ومناسبة ليك ولا لأ.
- اختار منصة بتدعم اللغة العربية: عشان تقدر تكتب إيميلاتك بسهولة من غير مشاكل في التصميم.
- ابحث عن الدعم الفني: لو أنت مبتدئ، اختار منصة زي Benchmark Email لأنها بتقدم دعم 24/7 حتى في الخطة المجانية.
في السوق العقاري، المنصة المثالية هي اللي تكون سهلة وتدعم التصميم على الموبايل، لأن معظم العملاء بيقرأوا الإيميلات على تليفوناتهم وانا ارشح MailerLite منصة بسيطة وسعرها كويس.
إنشاء حساب بريد إلكتروني احترافي
واحد من أهم الأدوات اللي لازم تشتغل عليها هو إنك يكون عندك إيميل احترافي، بدل ما تستخدم إيميل جيميل عادي زي “[email protected]”، حاول تعمل إيميل رسمي باسم شركتك زي “[email protected]” الإيميل الاحترافي بيدي انطباع بالاحترافية والمصداقية، وده مهم جدًا في مجال العقارات.
خطوات إنشاء إيميل احترافي
- اشتري دومين لشركتك: لو عندك شركة تسويق عقاري، اشتري دومين زي “yourcompany.com” من مواقع زي GoDaddy أو Namecheap السعر بيكون حوالي 200-300 جنيه في السنة.
- استخدم خدمة إيميل: مواقع زي Google Workspace أو Zoho Mail بتديك إيميلات احترافية (زي [email protected]) مقابل رسوم بسيطة، أو حتى مجانًا في البداية.
- اضبط الإيميل على المنصة: لما تعمل الإيميل الاحترافي، ربطه بمنصة البريد الالكتروني (زي Mailchimp) عشان تبعت منه مباشرة.
ليه الإيميل الاحترافي مهم؟
في السوق العقاري المصري، العميل بيحتاج يحس بالثقة قبل ما يشتري شقة أو شاليه لو بعتت إيميل من “[email protected]”، العميل ممكن يحس إنك مش جاد أو إنك فرد مش شركة، أما لو بعتت من “[email protected]”، هيحس إنك محترف وهيثق فيك أكتر الثقة دي هتفرق كتير في قرار الشراء.
نصائح لجمع قائمة إيميلات بشكل قانوني وفعال
جمع قائمة إيميلات هو أول خطوة عملية في التسويق العقاري عبر البريد الالكتروني، بس لازم تكون بشكل قانوني عشان ما تتعرضش لمشاكل زي إن إيميلاتك تترفض أو تتحط في الـ Spam.
لو عندك موقع إلكتروني لشركتك العقارية، حط نموذج تسجيل (Signup Form) بسيط على الموقع مثلاً، ممكن تعمل صفحة فيها عنوان “سجل دلوقتي عشان تشوف أفضل العروض في التجمع الخامس” الناس اللي هتسجل هتبقى مهتمة فعلاً، وده هيضمن إن قائمتك مليانة عملاء جادين.
اعمل صفحات هبوط مخصصة لكل مشروع عقاري، وحط فيها نموذج تسجيل عشان تجمع إيميلات الناس المهتمة بالمشروع ده بالذات مثلاً، لو عندك مشروع شقق في العاصمة الإدارية، اعمل صفحة هبوط فيها صور المشروع ومميزاته، ونموذج تسجيل بعنوان “سجل دلوقتي عشان تعرف كل التفاصيل!”.
استخدم صفحاتك على السوشيال ميديا (فيسبوك، إنستجرام) عشان توجه الناس لموقعك أو لصفحات الهبوط اعمل إعلان بعنوان “عايز شقة في التجمع بخصم 15%؟ سجل إيميلك دلوقتي!” الإعلان ده هيجيبلك عملاء مهتمين، وهتقدر تضيفهم لقائمتك البريدية.
اعمل مسابقات أو قدم جوايز للناس اللي بيسجلوا في القائمة البريدية بتاعتك مثلاً، اعمل مسابقة بعنوان “سجل إيميلك وادخل في سحب على معاينة مجانية لمشروع في الساحل!” الناس هتتحفز تسجل عشان تكسب الجايزة، وكده هتكبر قائمتك بسرعة.
الناس مش هتديك إيميلاتها كده من غير مقابل قدم حاجة مجانية زي “دليل مجاني لأفضل مناطق الاستثمار في الساحل الشمالي” أو “5 نصائح عشان تختار شقة في العاصمة الإدارية” لما العميل يلاقي إنك بتقدم حاجة مفيدة، هيسجل إيميله على طول.
لازم تاخد موافقة العميل (Opt-In) قبل ما تبعتله أي إيميل يعني ما تشتريش قائمة إيميلات جاهزة من الإنترنت، لأنك كده بتبعت لناس ما طلبوش منك، وده ممكن يأثر على سمعتك ويخلي إيميلاتك تروح للـ Spam كمان، حط دايمًا رابط “إلغاء الاشتراك” في الإيميل عشان العميل يقدر يلغي لو مش عايز يتابع.
في السوق العقاري، القائمة البريدية اللي بتكون مكونة من عملاء جادين هي كنز لو جمعت قائمة من 1000 عميل مهتمين بشاليهات الساحل، تقدر تبعتلهم عروض مخصصة، وده هيزود فرصك في البيع بشكل كبير.
خطوات عملية لإنشاء حملة تسويق عقاري عبر البريد الالكتروني
دلوقتي بعد ما عرفنا المصطلحات والأدوات، تعالوا نشوف إزاي تعمل حملة تسويق عقاري عبر البريد الالكتروني ناجحة خطوة بخطوة الخطوات دي هتساعدك تبيع شقق، شاليهات، أو أي عقار في السوق المصري بسرعة.
قبل ما تعمل أي حاجة، فكر إيه اللي عايز تحققه من الحملة دي؟ عايز تزود عدد الزيارات لموقعك؟ عايز تجمع ليدز جداد؟ عايز تبيع وحدات في مشروع معين؟ الهدف لازم يكون واضح عشان تقدر تقيس نجاح الحملة، مثلاً، لو هدفك هو بيع 5 شقق في مشروع في التجمع الخامس، هتشتغل على عروض وإيميلات مخصصة للعملاء المهتمين بالمنطقة دي.
مين هما الناس اللي هتوصلهم الإيميلات؟ قسم القائمة البريدية بتاعتك لشرائح حسب المنطقة، الميزانية، والاهتمامات. مثلاً:
شريحة مهتمة بشقق في التجمع الخامس بميزانية 7-9 مليون جنيه.
شريحة مهتمة بشاليهات في الساحل الشمالي بميزانية 4-8 مليون جنيه.
شريحة مهتمة بأراضي استثمارية في العاصمة الإدارية.
لما تقسم القائمة كده، هتقدر تبعت إيميلات مخصصة لكل شريحة، وده هيزود فرصك في البيع.
العنوان هو أول حاجة العميل بيشوفها، فلو العنوان مش جذاب، محدش هيفتح الإيميل أصلاً استخدم كلمات قوية ومثيرة، وحاول تخلي العنوان قصير ومباشر مثلاً:
بدل “عرض على شقق في القاهرة الجديدة”، جرب “الحق عرض الـ 20% على شقق القاهرة الجديدة!”
بدل “شاليهات للبيع في الساحل”، جرب “امتلك شاليهك في الساحل بخصم 15% لمدة يومين!”
العنوان الجذاب بيزود معدل الفتح، وده أول خطوة لنجاح الحملة.
استخدم تصميم بسيط وجذاب، وحط فيه صور عالية الجودة للمشاريع العقارية بتاعتك, استخدم ألوان متناسقة (زي الأزرق والأبيض عشان يدي انطباع بالثقة)، وخطوط واضحة, تأكد إن الإيميل متوافق مع الموبايل، لأن معظم الناس بيقرأوا الإيميلات على تليفوناتهم، لو بتبيع شقة في التجمع، حط صور الشقة، خريطة الموقع، وفيديو قصير عن الكمبوند.
المحتوى لازم يكون مفيد ومثير للاهتمام، ويجاوب على أسئلة العميل، ويشجعه على اتخاذ إجراء، مثلاً، لو بتبيع شقة في العاصمة الإدارية، اكتب:
“امتلك شقتك 120 متر في قلب العاصمة الإدارية الجديدة، موقع مميز قريب من الخدمات، تشطيب سوبر لوكس، ونظام تقسيط على 5 سنين!”
ركز على المميزات اللي تهم العميل زي السعر، الموقع، وأنظمة التقسيط.
الـ Call-to-Action (CTA) هو الزرار أو الرابط اللي بتطلب من العميل يضغط عليه عشان يعمل حاجة معينة، لازم يكون الـ CTA واضح وموجود في مكان بارز في الإيميل مثلاً:
“احجز وحدتك الآن!”
“اضغط هنا عشان تشوف صور الشقة!”
“اتصل بنا دلوقتي!”
حط الـ CTA في زرار ملون (زي أحمر أو أخضر) عشان يجذب الانتباه.
قبل ما تبعت الإيميل لكل الناس، ابعته لنفسك أو لزمايلك عشان تتأكد إنه شكله كويس، وإن الروابط شغالة، وإن كل حاجة تمام، جرب افتح الإيميل على الموبايل وعلى الكمبيوتر، وتأكد إن الصور بتظهر والخطوط واضحة، لو فيه أي مشكلة، لازم تصلحها قبل ما تبعت للعملاء.
بعد ما تبعت الإيميل، تابع النتايج وشوف كام واحد فتح الإيميل (معدل الفتح)، وكام واحد ضغط على الروابط (معدل النقر)، وكام واحد عمل إلغاء اشتراك، النتايج دي هتساعدك تحسن حملاتك اللي جاية، مثلاً، لو لقيت إن معدل الفتح قليل، جرب تغير العنوان، لو معدل النقر قليل، حط محتوى أكتر جاذبية أو عروض أقوى.
نصائح إضافية للمسوق العقاري المصري
عشان تكون حملاتك ناجحة في السوق المصري، فيه كام نصيحة لازم تاخد بالك منهم:
اكتب الإيميلات باللغة العربية الفصحى أو العامية المصرية، حسب جمهورك المستهدف، لو بتكلم جمهور راقي مهتم بشقق في التجمع، استخدم لغة فصحى بسيطة، لو بتكلم جمهور مهتم بشاليهات في الساحل، ممكن تستخدم عامية مصرية خفيفة زي “الحق عرض الـ 15% قبل ما يخلّص!” المهم إن اللغة تكون قريبة من العميل.
العميل المصري بيهتم بحاجات معينة زي الموقع، السعر، أنظمة التقسيط، والخدمات القريبة مثلاً، لو بتبيع شقة في التجمع، قول: “شقة 120 متر في كمبوند راقي، 5 دقايق من مول العرب، وتقسيط على 7 سنين!” المميزات دي هتخلي العميل يهتم أكتر.
الصور والفيديوهات بتساعد العميل يتخيل نفسه عايش في العقار بتاعك لو بتبيع شاليه في الساحل، حط صور للبحر، المسابح، والمساحات الخضرا لو بتبيع شقة، حط فيديو قصير يوري التشطيب والإطلالة الصور العالية الجودة بتفرق كتير في قرار الشراء.
العروض والخصومات بتشجع العميل على اتخاذ قرار الشراء مثلاً، ابعت إيميل بعنوان “خصم 20% على شاليهات الساحل لمدة 48 ساعة بس!” العروض الحصرية بتحسس العميل إن الفرصة محدودة، وده بيحفزه يتصل بيك على طول.
رد على أسئلة العملاء بسرعة، وتابع معاهم بشكل دوري، وحاول تبني معاهم علاقة ثقة مثلاً، لو عميل بعتلك سؤال عن شقة، رد عليه في نفس اليوم، وابعته إيميل تاني بعد يومين يقول “حابب تعرف أي تفاصيل زيادة؟” العلاقة الجيدة مع العميل هتخليه يشتري منك حتى لو مش دلوقتي.
أمثلة لإيميلات تسويقية عقارية ناجحة
عشان توضح الصورة أكتر، تعالوا نشوف أمثلة لإيميلات تسويقية ممكن تستخدمها في السوق العقاري المصري:
إيميل للتعريف بمشروع جديد
العنوان: “فرصة استثمارية لا تعوض في قلب العاصمة الإدارية الجديدة!”
المحتوى:
“إحنا سعداء جدًا إننا نعلن عن إطلاق مشروعنا الجديد في العاصمة الإدارية الجديدة! شقق بمساحات تبدأ من 100 متر، تشطيب سوبر لوكس، موقع مميز قريب من الحي الحكومي، ونظام تقسيط على 5 سنين تقدر تشوف كل التفاصيل من خلال الصور والفيديو.”
الـ Call-to-Action: “احجز وحدتك الآن!”
إيميل للتذكير بعرض خاص
العنوان: “العرض بينتهي خلال 48 ساعة.. الحق فرصتك!”
المحتوى:
“فاضل 48 ساعة بس على انتهاء عرض الخصم 15% على شاليهات الساحل الشمالي! شاليه 90 متر بإطلالة على البحر، وتقسيط على 3 سنين العرض حصري للمشتركين في قائمتنا البريدية.”
الـ Call-to-Action: “سجل الآن للاستفادة من العرض!”
إيميل لطلب معاينة
العنوان: “حابب تشوف وحدتك على الطبيعة؟ احجز معاينة مجانية!”
المحتوى:
“إحنا ندعوك لزيارة مشروعنا في التجمع الخامس ومعاينة الشقق المتاحة بنفسك، شقق بمساحات مختلفة، تشطيب عالي الجودة، وموقع مميز قريب من كل الخدمات، احجز معاينتك المجانية وشوف وحدتك على الطبيعة!”
الـ Call-to-Action: “احجز معاينتك الآن!”
ابدأ حملات البريد الالكتروني النهاردة وشوف الفرق
التسويق العقاري عبر البريد الالكتروني أداة قوية جدًا للمسوق العقاري المصري، بس محتاجة تخطيط وتنفيذ صح، في المقال ده، عرفنا أهم المصطلحات زي القائمة البريدية، معدل الفتح، معدل النقر، معدل الارتداد، وإلغاء الاشتراك، اتكلمنا كمان عن الأدوات اللي هتحتاجها زي منصات البريد الالكتروني(Mailchimp، MailerLite منصة بسيطة وسعرها كويس، وغيرهم)، وإزاي تعمل إيميل احترافي، وطرق جمع قائمة إيميلات بشكل قانوني.
شرحنا خطوات عملية عشان تعمل حملة ناجحة، وادينا نصايح وأمثلة تسويقية تناسب السوق المصري لمزيد من الاستفسارات تواصل معنا علي [email protected] وحنرد عليك في اقرب وقت ممكن .
سجل في دورتنا التدريبية “التسويق العقاري عبر البريد الالكتروني ” الدورة هتساعدك تبني استراتيجية تسويق ومتابعة قوية، تجذب عملاء جادين وتابع أداء حملاتك البريدية عشان تحسنها دايمًا لو محتاج أي دعم أو أفكار جديدة، إحنا هنا عشان نساعدك تواصل علي [email protected].
إيه معنى Open Rate وإزاي أحسّنه في حملات تسويق عقاري؟
الإجابة: Open Rate هو النسبة المئوية للناس اللي فتحوا الإيميل من إجمالي الإيميلات المرسلة، يعني لو بعت 100 إيميل عن شقق في مدينتي و25 واحد فتحوه، يبقى Open Rate هو 25%.
عشان تحسّنه، استخدم عنوان جذاب زي “امتلك شقتك في التجمع بمقدم 5% النهاردة”، وابعت الإيميل في توقيت مناسب زي ايام العمل الصبح بين 9 و12 الضهر، لأن الأبحاث بتقول ده أفضل وقت الناس شغالة الصبح وبتفتح ايميلاتها بشكل متكرر.
كمان، ركز على إرسال إيميلات لناس مهتمين فعلًا باستخدام تجزئة (Segmentation).
إزاي أستخدم Drip Campaign في التسويق العقاري الإلكتروني؟
الإجابة: Drip Campaign هي سلسلة إيميلات تلقائية بتبعتها للعملاء بناءً على تصرفاتهم مثلًا، لو عميل سجّل في موقعك عشان يشوف شاليهات الساحل، ابعتله إيميل ترحيبي الأول، وبعد يومين إيميل تاني فيه صور شاليهات وعروض، وبعد أسبوع إيميل تالت بيزوّد العرض زي “خصم 10% لو حجزت النهاردة”.
استخدم أدوات زي Mailchimp عشان تظبط التوقيت والتخصيص، الطريقة دي بتزود التفاعل بنسبة 30% لو عملتها صح.
إيه الفرق بين Hard Bounce وSoft Bounce في إيميلات التسويق العقاري؟
الإجابة: Hard Bounce يحصل لما الإيميل ما يتسلمش خالص بسبب مشكلة دائمة، زي إن عنوان الإيميل غلط أو مش موجود.
Soft Bounce يحصل لما المشكلة مؤقتة، زي إن صندوق البريد بتاع العميل مليان أو السيرفر عطلان، لو بتبعت إيميلات عن فيلات في الشيخ زايد، Hard Bounce معناه لازم تنضف قائمتك وتشيل العناوين الغلط، أما Soft Bounce حاول تبعت تاني بعد يومين.
استخدم أدوات زي SendGrid عشان تتابع Bounce وتحافظ على سمعتك.
ليه Double Opt-In مهم في التسويق العقاري عبر الإيميل؟
الإجابة: Double Opt-In يعني إن العميل يسجّل إيميله في موقعك (زي نموذج على موقع عقارات) وبعدين يأكد اشتراكه برابط في إيميل تأكيد.
ده مهم في التسويق العقاري عشان تضمن إن القائمة بتاعتك فيها ناس مهتمين فعلًا بشقق أو فيلات، مش مجرد إيميلات عشوائية.
الطريقة دي بتقلل السبام وبترفع جودة الليدات، يعني بتوصل لعملاء جادين في التجمع أو الساحل.
إيه أهمية Conversion Rate في حملات الإيميل العقارية وإزاي أزوّدها؟
الإجابة: Conversion Rate هي النسبة المئوية للناس اللي عملوا الإجراء المطلوب بعد فتح الإيميل، زي إنهم يملوا نموذج طلب معاينة أو يتصلوا بيك.
لو بعت إيميل عن شقق في التجمع و5 من 100 عميل حجزوا موعد، يبقى Conversion Rate هو 5%.
عشان تزوّدها، حط زر واضح زي “احجز معاينة النهاردة”، استخدم صور مغرية للعقار، واكتب نص قصير ومباشر.
كمان، استهدف عملاء مهتمين فعلًا باستخدام تجزئة القائمة البريدية.
إيه يعني A/B Testing وإزاي أستخدمه في تسويق عقاري عبر الإيميل؟
A/B Testing هو اختبار بتعمل فيه نسختين مختلفتين من إيميل تسويقي وتشوف أي واحد بيجيب نتائج أحسن، زي معدل فتح أو نقر. مثلًا، لو بتبعت إيميل عن شقق في التجمع الخامس، جرّب عنوان “امتلك شقتك بمقدم 5% النهاردة” في النسخة الأولى، و”شقة في التجمع بفيو مفتوح” في النسخة التانية.
استخدم أداة زي Mailchimp عشان تشوف أي عنوان جاب معدل فتح أعلى الطريقة دي بتحسّن حملاتك بنسبة 20% لو ظبطتها صح.
إيه فايدة List Segmentation في إيميلات التسويق العقاري؟
الإجابة: List Segmentation يعني تقسّم قائمة إيميلاتك لمجموعات حسب اهتمامات العملاء، زي الموقع أو نوع العقار.
مثلًا، لو عندك ناس بتدور على شقق في مدينة نصر وناس تانية على فيلات في الشيخ زايد، قسّم القائمة وابعت إيميل مخصص لكل مجموعة، زي “شقق في مدينتي تبدأ من 7 مليون” أو “فيلا في زايد بفيو مفتوح”.
ده بيزود معدل فتح الإيميلات بنسبة 22%.
إزاي Call to Action (CTA) بيخلّي إيميلاتي العقارية أقوى؟
الإجابة: Call to Action (CTA) هو زر أو جملة في الإيميل بتحث العميل يعمل حاجة، زي “احجز معاينة النهاردة” أو “اتصل بنا”.
لو بتبعت إيميل عن شقق في التجمع، حط زر CTA واضح زي “اطلب عرض الأسعار دلوقتي” بدل جملة مبهمة زي “اعرف تفاصيل”.
استخدم ألوان زاهية للزر (زي الأحمر) عشان يشد الانتباه CTA قوي بيزود معدل النقر بنسبة 15%.
ليه لازم أتجنب Spam Trigger Words في إيميلات التسويق العقاري؟
الإجابة: Spam Trigger Words هي كلمات زي “مجاني” أو “اضغط هنا” بتخلّي إيميلك يتصنف سبام وما يوصلش للعميل.
لو بتبعت إيميل عن فيلات في الساحل الشمالي، بدل ما تكتب “امتلك فيلا مجانًا الآن”، اكتب “فيلا في الساحل بمقدم 10% اطلب اليوم”.
الطريقة دي بتضمن وصول إيميلك لصندوق الوارد بنسبة 90%.
استخدم أدوات زي SendGrid عشان تتأكد إن نصك بعيد عن السبام.
مقالات قد تعجبك
كيف تكتب إيميل تسويقي عقاري ناجح في 8 خطوات بسيطة؟
